[Open]
[Close]
麻雀腳
我講左好幾個親戚朋友發生既故事, 而家終於輪到我自己出場啦,登登登登
不過我諗呢個故事只係我人生中比較貼近怪異既事情,其實只可以叫做邊緣,都算好好彩囉~
話說我媽媽都幾喜歡麻雀耍落既,同埋佢同d麻雀之友唔算玩得細架,如果 識打麻雀既朋友都知道,四番三百四十蚊位位, 有時打八番九百六十蚊,真係動輒都幾千蚊上落架..
咁媽媽有個朋友叫C 太,佢因為做聯誼會既呀姐,唔多唔少都識好多人,大約幾年前,C太和媽媽同其他人一齊打麻雀時,有個算叫做新識既麻雀腳,叫佢做A 小姐吧,呢位A 小姐連贏左佢地好多場,有次C太仲要輸到寫支票付錢,大約係七八千蚊咁, 可想然知A小姐每次都好幸運,但我媽媽就輸贏上落不大,比起其他人己經算好好多,咁C太就好唔忿氣,輸咁多場都仲不停叫呢位A 小姐打,(其實賭仔真係有時無性,概然輸咁多比呢個人仲要不停叫佢打既呢) 後來佢地其他人仲發覺A 小姐可能養鬼仔,點解會咁講呢, 因為每次去到A小姐會去叫聯誼會既人拎兩杯水係佢個位,但好奇怪,佢只會飲一杯, 同埋有時會拎D 蛋糕仔或一筒糖出黎,但到打完都無食過呢D 野, 只係擺係度.後來佢地唔比佢要兩杯水,但呢個A小姐永遠都仲係贏既~
咁我媽媽有時打完麻雀返黎都會略略講下A 小姐可能養鬼仔呢件事比我地聽~
之後戲玉就黎, 有次夜晚,無啦啦C太話要轉移陣地去我屋企打???有無攪錯,因為C太覺得佢地成日係聯誼會輸錢,不如轉去人地家可能情況唔同~
講真我地當然唔高興,但我媽媽都應承左人, 唯有答應佢地黎打(我媽媽係好和善既人,所以都好就佢D朋友)
當佢地黎到我屋企既時候,我妹妹都係度,因為我妹妹係我屋企附近買左樓, 咁橋果日佢要上黎我度拎番D野,
咁佢地幾個入黎後都無咩野,之後其實我見到有異樣,但我無出聲,呢點等我講完故事再講我睇到咩影像吧,咁佢地開始打麻雀,我諗大約十一點幾我覺得眼訓就入左房訓,朦朧就黎訓著之際,我突然聽到一下細路女笑聲,當堂成個人即刻醒哂,心諗, 原來果個A 小姐唔係養鬼仔, 係養鬼女,呢下笑聲之後仲不斷有小朋友笑聲出現,係我耳邊, 當時想起身, 但全身都郁唔到,叫又叫唔到,講真個心真係好寒,好彩我突然發到力,係我自己床下面,有一把桃木劍,係開過光既,( 因為先前個人好黑 運,咁有個六壬 既師傅幫我做左D儀式同埋比左把劍我既~),我拎到把劍跟住向空氣一揮,即時好奇怪,全屋既燈突然全部閃一閃,我都聽到出面打緊麻雀既佢地話,"嘩,想 停電呀'我估計我揮左把劍,可能對呢個小朋友有D傷害,之後,佢地打完,當然仲係呢個A小姐係大贏家啦,走左之後我即刻同我媽媽講以後都唔好叫呢個A 小姐黎同埋打麻雀, 佢唔係養鬼仔, 係養鬼女
自呢次之後, 我嚇到幾個月唔敢熄燈訓覺~
再講番咪 話A 姐一入黎我家我有異樣既, 第二日我同我妹印證左,原來我真係唔係錯覺
當A小姐黎我屋企時,我同我妹都見到有團黑影係我屋企既四周圍跳黎跳去,但我地唔係正眼望到,我地都係眼尾哨到,當一正眼望又咩都見唔到, 當時我同妹大家各自心諗幻覺黎既唶,但我後來原來知道大家當時見到既野係一樣~即係果隻小朋友係度周圍跳黎跳去
後來我媽都叫其他人唔好再同呢個A小姐打麻雀,因為真係有人會因為借助呢D小朋友要幫佢自己搵錢
