[Open]
[Close]
轉帖 天文台道新酒店前身
呢件怪事發生喺三十年前架la, 係我媽咪ge經歷, 希望同大家分享一下.
天文台道corner位果間新酒店(其實都起了差不多5,6年了), 前身係一座好似有6,7層高的唐樓, 我一出世就係住喺二樓ge一個單位, 呢座唐樓一梯只有兩伙, 單位面積都幾大, 不過我住到3歲就搬走左lu.(果陣, 小生陶x宇都係住呢幢樓的).
呢件古怪事係發生喺我媽咪身上ge, 都有成三十年前la, 我媽咪都係等我大個左先講番俾我知.
等我形容一下呢間屋, 因為細個唔識驚, 其實呢間屋我細個都感覺好怪, 只不過細個唔識講俾大人知, 亦唔知d神怪野係咩一回事.
大家知唔知以前呢類唐樓咁大, 好多時都會分租出去, 之前提過呢間屋都幾大ge, 有1個大廳, 1個偏廳, 4間房,2個浴室, 一個前門, 一個後門, 仲有一道門係通去另一條樓梯(其實因為我果陣太細個, 真係冇咩印象, 只係記得後門同果道通去一條唔知咩樓梯的門, 大人係唔准小朋友開, 話入面全部都係曱由wor....), 不過我試過趁d大人有時打開果陣, 都會埋去裝下, 印象中都係好黑好黑..好污遭ge後樓梯咁la...
呢間屋, 每一間房其實都係住左一戶人, 唔係我屋企住晒架...一入門口果間房就係我e媽住ge(我呢個e媽, 有好多怪經歷, 連我表妹(e媽個女)都係由細開始已經有好多古怪事發生, 有機會再同大家講), 一入門口第二間就係我同爸爸媽媽, 我地同e媽果間房都係對住個大廳ge, 而走廊入去就係另一間房, 住左一對母子, 我好記得, 佢地永遠唔會關埋道房門, 經常留番一條"la", 細細個梗係有好奇心架la, 於是我一入親廚房或者去式廁所我都會裝下佢地, 通常都係見到個仔訓喺張床度睇書, 而佢阿媽我都無咩印象la, 只不過, 佢地永遠都唔會出廳(個廳係幾戶一齊用的), 亦永遠唔會見到佢地出街.....總之好古怪...幾年之後, 聽d大人講話果個阿媽過左身lu, 個仔自已搬走左lu.
至於尾房, 係住左一個單身男, 我對佢係零印象, 都係好少見, 成日困自己在房, 不過因為佢住喺尾房, 所以我更加唔會經過佢間房.
大家估唔估到全屋最恐佈係邊個地方呢...........就係個偏廳la, 其實諗起我都毛管棟, 首先偏廳個位已經好古怪, 佢係喺走廊ge隔離, 而唔知點解, 偏廳個樓底係矮d, 大約只有一個人ge高度, 所以望落去成日都覺得果度特別暗, 放左張舊梳化, 因為唔會有人去坐, 所以封晒層, 令到個偏廳更加陰森. 果陣個電話係放喺偏廳頭近走廊位, 我去親玩電話都感覺好驚, 細個唔識點講, 總之感覺好奇怪咁la.
剛才講過我地一家人住一間房ge, 果陣我媽咪剛同我老豆結婚(我未出世), 公公婆婆就俾左呢間房我媽咪老豆la, 我老豆一天光就返工, 天黑先返, 而我阿媽係喺某百貨公司做收銀ge, 要輪班.
有一次我媽咪返晏, 大約返三點左右la, 咁佢要一點幾兩點起身準備返工, 佢通常都訓到夠鐘先起身, 但係, 呢一日佢訓訓下, 俾d拍門聲嘈醒, 佢仲估係咪果幾個租客定係我e媽(即係佢家姐)拍佢房門, 佢就開口問邊個呀, 無人應, 佢落床去開門, 門外面一個人都冇, 佢咪諗自已發夢lor.
到左第二日, 又係返晏, 又係果個時間, 又係俾一輪拍房門聲嘈醒, 今次我媽咪冇問係邊個, 就直接去左開門, 依然係無人wor...
自此之後, 我媽咪只要一輪班返晏, 就十次有九次都會有拍門聲叫醒佢....仲準過鬧鐘.
我聽完之後問媽咪你唔驚ka咩?? 媽咪話:車, 有咩好驚, 佢又冇害我, 我又冇做壞事害人, 唔使驚.
不過, 如果換轉係我, 我諗我嚇到想喊.
