[Open]
[Close]
令人心酸的靈異事件
彩雲邨觀日樓對面有一座山(註﹕呢座山ge背面就係牛頭角得寶花園/彩盈邨(?))，呢座山曾經開過礦，個形狀好似無咗頭ge佛祖。
當年我住响彩雲邨，屋企個露台對正呢座山(註﹕我家住5樓)。有一日下晝(註﹕我應該係放緊假ge )，我行出露台去洗手間，無意間望倒有一個男人(阿叔打扮，大約40多歲)，同埋兩個小朋友(好矮細，好似係1男1女，估計讀緊小學 1 - 3 年級)正行落山。我望倒佢地ge 時候，佢地已經差不多行到落新清水灣道ge 路面。
當時我直覺覺得佢地係「爸爸 + 囡囡 + 囝囝」。但好奇怪，爸爸行最前，佢後面係囝囝，囝囝後面係囡囡。囝囝行得好倫盡，仲有幾次差D跌低，但爸爸拖都唔拖吓個囝囝。
之後，當晚ge電視新聞報導(註﹕第二日ge報章都係咁報導)，有一個男人帶同兩名子女去呢座山「行吓」，點知遇上非法入境者(「II」)，仲俾II襲擊。II用石頭打暈咗爸爸，到爸爸醒番之後，爸爸發現兩名子女被人用石頭「亨」頭致死。於是爸爸即刻落山報警。電視新聞仲有播出警務人員陪同爸爸上山調查ge 片段，我一眼就認得出爸爸。
睇完呢段新聞報導之後，我個心一路諗，佢地明明落咗山架啦，點解無端端又走返上山送死呢? 唔通有D野真係「整定」ge?
之後第二日，各大報章都以呢單新聞做頭條。報章報導話佢地上山無耐就遇見II，之後被II襲擊，並無提及過佢地曾經落過山，然後再上番山。咁講的話，我見倒行响爸爸後面ge囝囝&囡囡，到底係人定係.......
可能我對呢單野有D「感覺」啦，响呢單野發生後第二日，我响露台望倒爸爸同一個肥女人(註﹕我相信係媽媽)行上山，個女人攞住一個衣紙舖ge紙手抽袋，應該係上去拜祭。當日稍後時間，我又望倒爸爸同肥女人行落山。之後又過咗幾日，我又响露台望倒爸爸同疑似警務人員行上山(註﹕前前後後我都見過爸爸上山3、4次)。各位blog友，你地千祈唔好以為我諸事八卦，一日到黑捕响露台。實情係我每一次望倒爸爸，都係我一行出露台望向對面山就見倒佢。當然，可能佢果輪成日去對面山憑弔，出現得多，俾我見倒三、兩次都唔出奇。
之後，警方經過一輪調查後，終於搵倒殺死囝囝&囡囡ge真兇，真兇竟然係爸爸。
成件事原來係咁ge......爸爸一家4口住响順利邨，囝囝&囡囡係出哂名ge乖孩子，而媽媽係一個脾氣好暴躁ge肥女人(註﹕有街坊作證)。囝囝同囡囡做錯少少野就會俾媽媽毒打，好多街坊都好同情兩個小朋友，但因為媽媽太潑辣，所以無人敢「代出頭」。爸爸好怕老婆，佢知如果自己幫仔女出頭的話，媽媽會打得佢地仲勁，所以佢一見老婆打仔女，就走出街無眼睇。但爸爸內心好難受，佢覺得自己害咗兩個仔女，又深信兩個小朋友遲早會俾媽媽打死，爸爸想吓想吓想到儍咗，居然想出呢個為仔女「解脫」ge方法.....佢自己親手用石頭打死兩個仔女，等佢地一死了之，以後都唔駛再俾媽媽毒打。
呢單新聞出咗之後，响社會都引起一陣回響。根據當日報章報導，爸爸一被落案已經即刻申請同媽媽離婚，同埋爸爸覺得講咗個真相出嚟，個心「舒服」咗好多。媽媽就真係大輸家，變到無人無物，之後都搬走咗。
所以我話，呢單野有一個靈異ge開始，一個令人心酸ge結局。
