Reply 樓主
大概睇完啦 我諗大家都係為左vlan好 都係想有個良好既遊戲感覺 所以我明白你講咩
你講既野好有道理 亦係岩既 不過我就唔係咁同意你講既野
首先 我唔可以抹殺你有呢種咁既高尚精神 的確 真係會有呢種人 我自己都會走埸 我亦唔勁 只係一個中意打信長既路人 但係我覺得你未免太過將一D真確既野變成理想 情緒極差 白目既人 依你既方法 你會忍 但係講真 如果我見到呢D人 我都會忍佢一陣 如果大家開始令大家老豆老母出黎講果陣 我寧願走場 做乜野要自己難受 係到受人地氣 而唔自己搵過個場玩過既 始終都係遊戲 你可以簡玩定唔玩 所以我唔會覺得走場去逃避果D野蠻人係一個錯野方法 對於我黎講 呢個亦都會係佢地既懲罰 自己人鬧自己既 佢地就打少個 但係對方鬧自己我反而冇咩所謂 因為佢地只會打字而唔會食兵等等 只會係佢地自己既損失
你中間果段咩一打多人 鬧新手果度 我都幾同意 首先 其實就算自己果邊係35 25 15都好 你諗下 如果你係5人果邊 對面冇哂人又好 得番小貓一兩隻又好 如果裝備都唔係太前期既話 你地都一定會GG完場啦係咪? 所以35 25 15果陣留番係度 真係可以有一人打多人既經驗 不過你食左裝比其他人肥呢樣野就點都會有D影響 因為大家既裝備都唔係公平
而對於你話鬧新手果度 我明白如果自己果邊有一個新手就好似打45咁 都係果句 呢個係遊戲黎 每一個人都有玩信長既權利 每一個人都會有新手既階段 我知打梗果陣 新手可能會害到自己被殺OR肥對面 但係咁又點 遊戲一場 你不如簡簡單單咁教下佢點出裝 點出技仲好啦 插新手好爽咩? 一D都唔覺 咁樣只會顯得自己更無能
其實真係 做新手對面既都讓下D新手 唔好一見到D新手就屠屠屠 相信有好多人都有玩LOL呢隻GAME 好多人都係由信轉去LOL 覺得LOL好過信好多 就唔講佢既遊戲性果D野 就係佢個system都好過好信長好多咁... 其實我真係好想講 兩樣根本就係唔同既野黎 LOL係一個獨立既遊戲 但係信長只係一個圖黎 所以有好多改進既地方 如果唔係vlan都唔會成日改善個圖 但係我都依然玩信係因為我對信長有一種LOL冇既親切感 我諗起同同學朋友一齊玩既開心時光 所以我到呢一刻都仲玩梗信 信長有LOL呢個競爭對手 只會愈黎愈少人玩 再加上有D輸唔起野人插新手 到時信長就真係唔會有人再玩 所以希望大家都對新手有個包容 唔一定要好花時間 嘔心瀝血咁教佢地 稍稍提醒同讓步我覺得已經好足夠
Finally, 樓主你個topic同個content好似唔係太match 你篇野見到你對打信長期望同熱誠 我都一樣 想vlan有個健康既遊戲環境 你篇野我有75%都agree 姐係一睇落自己都會點點頭認同 但係其餘果25%我就同你有D出入啦 你篇野入面 所描述既人 如果有人真係做到你所講咁樣 佢就算呢刻係個新手 佢係將來既日子都會係個高手 但係問心果句 我真係唔覺得有幾多人會做齊你所講既野 所以我睇你篇野果陣覺得成篇野個tone怪怪地咁
Anyway 以上都只係我個人意見 我自己一D都唔勁 但係我中意打信 心入面都想vlan有個好既遊戲環境 所以希望大家唔好怪我打既野觸怒到各位
