[Open]
[Close]
係信長入面,我體會到好多人生哲學
以下既說話 , 係我無玩信長之後 , 想表達既意見
各位有品既朋友 , 信長已經今非昔比 , 台灣圖作者比班玩家逼到離開 , 香港區都遭受同樣既命運 ?
你永遠滿足唔到所有人既需求 , 因為人既慾望係無限大
身為呢個悲慘物種既一份子 , 自問無能力去改變人類與生俱來既劣根性
但係每一個個體, 都有改變未來既能力 , 小小美好既改變 , 所創造出黎既連鎖反應絕對令人意想不到
舉個例子 , 你今日將一首你中意既歌分享比幾個朋友 , 再叫朋友各自分享出去 , 呢個小小既反應鏈其實已經可以觸及全世界 , 同樣原理 , 亦都創造左江南style 既傳奇
各位有無諗過 , 如果不斷傳播世界既 , 係關懷 , 係親切 , 係善意既問候 , 係無私既奉獻 , 我地既下一代仲有無可能輕易誤入歧途 ?
人總會成熟 , 曾經幼稚既你總會有破殼而出 , 綻放光芒既時候
如果閣下 已經係一位成功人士 , 非常恭喜你 , 希望你善用才能 , 發揮自己既影響力
如果你好似我一樣 , 係電腦面前無所事事 , 點解唔諗下改變現況 ?
我成日都諗到好遠 , 反正人生只不過好似一場夢咁 , 貴賤窮達無常 , 得又何歡 , 失又何愁 ?
有好多人都諗住今日有酒今朝醉 , 享盡吃喝玩樂 , 不枉此生先至係王道
但係我漸漸先發現我比好多人都珍惜而加既一切 , 先唔講屋企有唔有錢(事實窮鬼一個) , 令唔令仔(事實薯仔一個) , 單單係五肢健全 , 無病無痛 , 無英年早逝 , 已經係非常值得感恩既事
行好事 , 做好心未必有好報 , 但係懷住咁拘謹既心態做人 , 真係舒服咩 ?
人生來就有測隱之心 , 我地天生已經唔能忍受同伴受苦 , 到底係我地做既唔夠多 , 定係我地因為事勢更迭而刻意隱藏左呢顆熱刺刺既心意呢 ?
要為呢個世界帶既美好既改變其實好易 , 你唔洗學李嘉城咁賺大錢 , 然後不斷做慈善活動
唔洗好似Mother Teresa咁傾盡一生黎照顧窮人(當然你可以,絕對歡迎)
你只要離開一下你既鍵盤 , 向身邊既人送上善意既問候 , 呢股暖意會深深咁感染你身邊既每一個人
回望信長呢隻game , 就好似見到昔日懵懂既自己 , 眼中只有前面五光十色既世界 , 而漸漸忘記背後 , 自己負擔住家人既期望 , 忘記一展雄圖既抱負 , 忘記力求上進既野心
希望各位唔好輕看自己既能力 , 隨住網絡世界既發展 , 普及教育既傳遞 , 只要你我肯付出少少 , 想為呢個美麗既星球帶既好既改變絕對唔係難事
係呢個寂靜既夜晚 , mock exam既煩惱令我輾轉反側 , 訓唔著 , 又醒起屋企無早餐 , 於是落7-11度買左兩包排包 , 見到d司機仲好努力咁工作緊 , 而且有d 18歲左右既青年係樓下吹水 , 夾雜住粗口傾說緊佢地無聊既工作同埋冷血上司等等
不禁令我思索未來既人生路到底如何走 , 或許我會平步清雲 , 或許將來我地會係m記/7仔碰面 , 希望我地係果個時候 , 都係為左追逐夢想而努力
人生如棋 , 落子無悔 , 偶然係屏幕度一個小小既論壇同各位相遇 , 係一種緣份 , 除左娛樂 , 呢個世界仲有好多美好既野我地未尋覓 , 但願各位係時間既恆河裡 , 過住一段有意義既旅程
係信長經歷既種種喜怒哀樂 , 成就左而加唔完整既你 , 但願各位可以搵到其他拼圖 , 為自己既一生 , 拼出美滿既圖畫
