以下內容全部自己打
本來諗住幾百字了事 點g寫寫下就停唔到變左千幾字
唔知大家對睇動漫呢個興趣有咩睇法, 我自己就認為睇動漫百利而無一害。未必算得上高尚，但絕對係一樣唔錯既興趣。可能有d人會話，媽好毒呀，但係咁真係叫毒?咩叫做毒?以我所知毒係講緊戈d好似電車男咁，係人際關係有障礙既人，但我就睇唔出睇動漫同呢樣有咩直接關係。只不過係戈套該死既電車男男主角既宅又毒，而導致好多人將御宅族、動漫電玩迷同毒男混為一談，況且我唔認為單靠人地有睇動漫習慣，就可以判斷出人地毒唔毒。不過，依家「毒」呢個字係香港網民既意思上十分模糊，而且呢d網絡上既詞句，d人點樣用，詞語既意思就隨時會變，所以我都唔針著係毒呢個字，加上又唔係主題。
先講動漫有咩好處啦，首先可以減輕壓力，又可以學到野，例如「如果連自己都對自己無信心既話 就算身邊既人放幾多期望落你到都係無用」、「人多總比自己一個人容易渡過難關」、「有時為左守護自己中意既野，會用先入為主既諗法去貶低其他野」......，不過就咁講好似好行，所以我就以自己為例子，講下對我有咩幫助。
以前，我正係一個日日起身番學讀書，放學老母迫我溫書訓教，重覆又重覆，戈陣對呢個世界都幾厭惡，覺得d生活好苦悶，戈陣只不過係小學生，d時間又過得慢，諗起仲要做幾十年人，已經對個世界無咩希望。小學_唔會拍拖住，所以先講朋友同埋家人喇。我成日睇唔起d同學，態度又囂張，所以無咩朋友，就算有都唔會係深交。老母又正係識得煩膠我去溫書，我又唔想，自然會反感，好容易因為小小既事就會嘈交，即使物質上滿足，都唔見得有咩好開心。但係升中學後，自從我睇動漫，我了解到人生最重要既唔係金錢，亦都唔係地位，最重要既係人與人間既關係。對人生既睇法唔同左，親情、友情、愛情，比起金錢更可靠更長久更溫暖更滿足。為我既人生帶來左好大既轉變，灰白既人生就好似上左色一樣，我放膽搬哂d野出黎同父母講之後，佢地係學業上對我自由左好多，雖然成績係差左，但係我確實開心左好多，呢層我諗老豆老母都察覺到，所以先無比太大壓力我。又主動識多左好多新朋友，無再咁自大，謙卑d聽人講野，接納其他人。比起我小學戈陣既頭十名，我更中意中學中下階層既生活，覺得自己活得更實在更精彩。
所以動漫對我既影響真係好大，其中對我影響最深既就係key社既作品。key社作品都以社會、人際關係、友情、愛情為題材，以帶少少科幻色彩既故事，帶出又感人又有意義既大道理，其中感情既刻劃最為突出。無論係clannad抑或little buster都是獲益良多，畢生受用。有d人對三次元絕望，而幾乎放棄，更揚言只要二次元，對於呢d咁消極既睇法，你話我假毒能又好，咩都好，我都會唔認同，我認為兩邊都係必要既，二次元係幫助我地面對三次元，如果將二次元當做逃避三次元既地方，未免太貶低二次元既存在價值，更加貶低動漫迷作為人類既自尊。我認為大家都係睇動漫但係呢種消極逃避既出發點，只會迫死自己，而且你對三次元既放棄只會令其他未接觸過既人對二次元產生負面既評價。理應學以致用，將二次元學到既野，得到既野係三次元應用番出黎，先係正確。
另外呢，動漫其實都分好多種，唔同類型動漫都會有唔同主題，好似有d人話k-on垃圾廢萌片，但係我一直都當係一套小品咁睇，而且佢主題大概係歌頌友誼，都總算做到呀。當然會有d你特別中意，但我都係鼓勵咩都睇下，你食飯都要食下肉嫁~你食肉都要食下菜嫁~，睇得j片多都要睇下熱血野中和下嫁，一個興趣能滿足你不同需求，不是很了不起嗎?其實講到尾，動漫實在幫左我唔少，所以我有個理念，係傳福音，令更多人得救，就算你唔去睇，都減低你地既偏見同誤解，其實動漫都會帶來好多正面影響，我可以好大聲咁講，我得到既絕對比我失去既多，唔好再叫我戒毒。
去綜合動漫區睇下啦 等咩
[
本帖最後由 ★洪九_× 於 2010-11-22 17:55 編輯 ]
