[Open]
[Close]
[幫個朋友]一個香港做既桌上遊戲
我諗，我算係見証住成個香港創意行業既興衰既一輩。
我後生幾年個陣鍾意打機，但係唔係Ｄ大路既ＯＬ ＧＡＭＥ，而係一Ｄ失落左既單機ＧＡＭＥ。
好似火狗工作製作既遊戲，仲有幾隻正版單機ＧＡＭＥ既光牒係手，大路既軒轅劍３（雖然唔係香港製）、仙劍之類，當然都有玩有收藏。
另外一方面，我又鍾意睇漫畫，玉皇朝既神兵玄奇、天子傳奇（天６的朝華版全套仍然安好）、龍虎門等等，馬先生既天下、黑豹、中華英雄，繁多恕不盡錄。
其實我列舉咁多香港製既野，我都只係想講，香港人係創作方面，都曾經都有一份驕傲。
係由幾時開始，我地身邊既文化漸漸偏向左周圍既地方－－小說回大陸網看、漫畫則是看日產的，英雄漫畫則是看Ｍ社和ＤＣ社的，遊戲也是偏日本的，當然在遊戲方面，韓國的影響也絕對不少。
我唔係想講日本或歐美既唔好，佢地都有好多好多經典，遊戲方面好似牛蛙既遊戲直到今時今日都係唔會玩得悶，日系光榮早期的三國和大航系列也是個經典，Ｍ社和ＤＣ社的英雄們更加不用我說，至於大陸的小說網……不詳述了。
但係今日望番去香港既創意行業，死既死、殘既殘，做代理可能比起自己畫既漫畫更賺錢（所以我非常非常欣賞今時今日都仲堅持下去既邱福龍先生，鐵將好讚。）
講一大輪終於講到呢度既主角，原諒我繞左好大個圈。
我係朋友介紹既情況下開始玩ＢＧ，失望地，由台港做既ＢＧ，真係幾隻手就數完，要數呢幾年爆得起既，三國殺同風聲（再次原諒我孤陋寡聞）都係中國製既。
今年，我位朋友Lokson突然之間講佢要整ＢＧ，起初我真係潑佢冷水架－－唔好玩啦，香港搞ＢＧ真係乞米架，自己手上有Ｄ錢唔好咁浪費啦，香港人邊有創意架？
但係今時今日，佢用行動、用實際既表現狠狠咁打左一巴，世界議事會籌備已久終於可以上市賣得。
我就唔吹呢隻ＧＡＭＥ有幾好玩幾好玩，ＯＫ既，如果出面既ＢＧ都係賣呢個價，我覺得佢都可以同佢地咬下手瓜。
咁如果有一個機會可以同Ｄ桌遊大咖們咬下手瓜，最少，我見到既係，香港既創意行業未死得哂。
我地呢班香港青年，仲可以整得出隻桌遊出黎賣去中國、賣去歐美、賣去台灣、賣去日本，我地香港人創意未死架！
與其講埋一Ｄ空泛既承諾話要點改變點改變香港，其實香港要變唔係要句口號要個精神，今時今日就有大大份Make in HK既世界議事會係度，我地呢班年青一代仲有一團火係個心度，要將佢燒起黎，話俾人聽，香港既創意，係得既。
如果你玩開ＢＧ，今時今日手上拎住既係三國殺之類既，可唔可以俾個機會我地香港製造既世界議事會當係支持一下呢一班仲有團火既後生仔呢？抑或係，我地要掩熄自己個團火，去安份咁做一個係企業工作既小職員呢？
話俾世界上既所有人聽，香港人仍然有夢有火。
