萬般的蠢事

某男藝人（「A先生」）有一次拉大隊去雲頂登台，因為佢地套劇响當地ge收視相當理想，所以獲得主辦單位熱情招待。

當佢地一行人抵達雲頂酒店ge時候，酒店員工第一時間招呼佢地上房，仲將成層樓留哂俾佢地用。據酒店員工講，果層樓一向只會用嚟招呼貴賓，所以裝修得特別靚，同埋好少開放。A先生因為果期比較「紅」，所以可以一個人獨佔一間房。

A先生一入到房就將行李放响近窗口果張床。當佢擰轉面打算入洗手間之際，佢聽倒一把令人毛骨悚然ge笑聲(註﹕A先生話9成9似羅蘭姐d嚇人笑聲)，由衣櫃傳到去佢耳邊，再由佢耳邊退返入衣櫃。呢把笑聲係由遠而近，再由近而遠咁傳送，好有層次感，傳到去佢耳邊時，佢直頭全身毛管都棟起哂。

當A先生仲係疑幻疑真之際，果把可怕笑聲又再一次出現，不過呢次加埋視覺效果--- A先生見倒有一團煙(註﹕Mami唔記得係黑煙定係白煙)伴隨住果把笑聲由衣櫃出發，繼而直衝到佢身邊，之後退番入衣櫃。

A先生肯定自己撞野，佢好想即刻逃離房間，但....要走一定要經過衣櫃個喎!!!!!!!  會唔會一行經衣櫃就即刻俾「衣櫃裡的朋友」捉實兼拉入衣櫃呢????唔走的話，「衣櫃裡的朋友」ge行動會唔會進一步升級呢???

橫又死掂又死，最終A先生鼓起最大勇氣，深呼吸一下之後，將行李放上左邊膊頭，實行用行李做屏障，等自己行過衣櫃時唔會見倒個衣櫃。之後，佢就極速逃離「鬼房」。

一離開「鬼房」之後，A先生即刻走去對面房狂拍門。當房門打開ge時候，A先生見倒好多同行人員都响裡面，佢地一見倒A先生咁慌亂ge神色，亦都估到發生乜事。原來好多人都遇倒「唔對路ge野」，包括開極都開唔倒房門、水龍頭/房燈失控、房內有怪聲....有部份對靈界有感應ge人士甚到見倒靈界朋友添。於是，佢地就搵保母去同主辦單位交涉。

最終結果係....因為當時係新春期間，酒店房間已經爆滿，無房可以換俾佢地，佢地迫於無奈只有硬著頭皮繼續住到登台完畢為止。

响呢次登台之後，A先生都有打探過呢間酒店D野。據可靠人士透露，原來A先生入住果層樓係出哂名ge「靚裝猛鬼floor」。果層樓「好鬼死猛」(註﹕據說靈界朋友雲集)，酒店方面搵師傅搞極都搞唔掂，最終唯有採取放棄態度，一於斬腳趾避沙蟲，盡量唔賣呢層樓D房(因為呢層樓真係賣親房都出事)。

各位blog友，如果你地去雲頂酒店留宿，而酒店方面又「懶」好咁話upgrade你去好D ge房，千祈咪貪小便宜呀!!!! 據說果d房無間好野架